ಕಲಬುರಗಿ:ಕರ್ನಾಟಕ ರಾಜ್ಯ ಯಾದವ ಗೊಲ್ಲ ಸಂಘ ಮತ್ತು ಪ್ರವರ್ಗ–1ರ ಜಾತಿಗಳ ಒಕ್ಕೂಟದ ನಾಯಕರಾಗಿರುವ ಹಾಗೂ ವಿಧಾನ ಪರಿಷತ್ ಸದಸ್ಯರಾದ ಡಿ.ಟಿ. ಶ್ರೀನಿವಾಸ್ ಅವರನ್ನು ಮುಂಬರುವ ರಾಜ್ಯ ಸಚಿವ ಸಂಪುಟ ವಿಸ್ತರಣೆಯಲ್ಲಿ ಮಂತ್ರಿಯಾಗಿ ನೇಮಕ ಮಾಡಲು ಸರ್ಕಾರ ಕ್ರಮವಹಿಸಬೇಕೆಂದು ಜಿಲ್ಲಾ ಯಾದವ ಸಂಘದ ಜಿಲ್ಲಾಧ್ಯಕ್ಷ ಕುಮಾರ ಯಾದವ ಅವರು ಒತ್ತಾಯಿಸಿದ್ದಾರೆ.
ಕುಮಾರ ಯಾದವ ಅವರು ಸುದ್ದಿಗೋಷ್ಠಿ ಹೇಳಿಕೆಯ ಮೂಲಕ “ಕರ್ನಾಟಕದಲ್ಲಿ ಯಾದವ (ಗೊಲ್ಲ) ಸಮುದಾಯವು 19 ಲಕ್ಷಕ್ಕೂ ಅಧಿಕ ಜನಸಂಖ್ಯೆ ಹೊಂದಿದ್ದರೂ, ರಾಜಕೀಯವಾಗಿ ಬೇಕಾದಷ್ಟು ಪ್ರತಿನಿಧನೆ ದೊರೆತಿಲ್ಲ. ದಿವಂಗತ ಎ. ಕೃಷ್ಣಪ್ಪನವರ ನಂತರ ಸಮುದಾಯದ ಒಗ್ಗಟ್ಟನ್ನು ಪುನರುಜ್ಜೀವನಗೊಳಿಸಿದ ನಾಯಕರು ಡಿ.ಟಿ. ಶ್ರೀನಿವಾಸ್” ಎಂದು ಹೇಳಿದರು.
ರಾಜ್ಯ ಗೊಲ್ಲ (ಯಾದವ) ಸಂಘದ ಚುನಾಯಿತ ಮೊದಲ ಅಧ್ಯಕ್ಷರಾಗಿರುವ ಶ್ರೀನಿವಾಸ್ ಅವರು ತಮ್ಮ ನೇತೃತ್ವದಲ್ಲಿ ರಾಜ್ಯದ ಅನೇಕ ಜಿಲ್ಲೆಗಳಲ್ಲಿ ಪ್ರವಾಸ ಕೈಗೊಂಡು, ತುಮಕೂರು, ಚಿತ್ರದುರ್ಗ, ಚಿಕ್ಕೋಡಿ ಸೇರಿ ಹಲವು ಕಡೆ ಸಮಾವೇಶಗಳನ್ನು ನಡೆಸಿ ಸಮಾಜವನ್ನು ಸಂಘಟಿಸಿ ಬಂದಿದ್ದಾರೆ.
2024ರ ಆತ್ಮೀಯ ಶಿಕ್ಷಕರ ಕ್ಷೇತ್ರದ ಎಂ.ಎಲ್.ಸಿ ಚುನಾವಣೆಯಲ್ಲಿ ಕಾಂಗ್ರೆಸ್ ಪಕ್ಷವು ಇದುವರೆಗೆ ಗೆಲುವು ಕಂಡಿರದ ಕ್ಷೇತ್ರದಲ್ಲಿ ಅವರು ಮೊದಲ ಬಾರಿಗೆ ಪಕ್ಷಕ್ಕೆ ಜಯ ತಂದುಕೊಟ್ಟದ್ದು ವಿಶೇಷ ಸಾಧನೆ ಎಂದು ಸಂಘದ ನಾಯಕರ ಅಭಿಪ್ರಾಯ.
ಶಿಕ್ಷಣ ತಜ್ಞರಾಗಿರುವ ಡಿ.ಟಿ. ಶ್ರೀನಿವಾಸ್ ಅವರು ಅನೇಕ ಪದವಿಗಳನ್ನು ಹೊಂದಿದ್ದು, ಹಲವು ಚುನಾವಣೆಯಲ್ಲಿ ತಮ್ಮ ಚಾಣಾಕ್ಷ ತಂತ್ರಗಳ ಮೂಲಕ ಯಶಸ್ಸು ಸಾಧಿಸಿದ್ದಾರೆ. ಪ್ರವರ್ಗ–1ರ ಜಾತಿಗಳ ಒಕ್ಕೂಟದ ಅಧ್ಯಕ್ಷರಾಗಿ 95ಕ್ಕೂ ಹೆಚ್ಚು ಅತೀ ಹಿಂದುಳಿದ ಸಮುದಾಯಗಳನ್ನು ಸಂಘಟಿಸಿ ಅವರ ಪ್ರಗತಿಗೆ ಶ್ರಮಿಸುತ್ತಿದ್ದಾರೆ.
ಈ ಎಲ್ಲ ಕಾರಣಗಳನ್ನು ಮನಗಂಡು, ರಾಜ್ಯ ಸಚಿವ ಸಂಪುಟ ವಿಸ್ತರಣೆಯಲ್ಲಿ ಹಿಂದುಳಿದ ಮತ್ತು ಯಾದವ ಸಮಾಜದ ಪ್ರತಿನಿಧಿಯಾಗಿ ಡಿ.ಟಿ. ಶ್ರೀನಿವಾಸ್ ಅವರಿಗೆ ಸಚಿವ ಸ್ಥಾನ ನೀಡಬೇಕು ಎಂದು ಸಮಸ್ತ ಯಾದವ ಸಮಾಜ ಪರವಾಗಿ ಕುಮಾರ ಯಾದವ ಅವರು ಸರ್ಕಾರಕ್ಕೆ ಮನವಿ ಮಾಡಿದ್ದಾರೆ.
