ಚಿತ್ತಾಪುರ ಪಟ್ಟಣದಲ್ಲಿ ಯಶಸ್ಸಿಯಾಗಿ ಜರುಗಿದ ಆರ್.ಎಸ್‌.ಎಸ್ ಪಥ ಸಂಚಲನ

ಚಿತ್ತಾಪುರ: ಪಟ್ಟಣದಲ್ಲಿ ಭಾರಿ ಪೊಲೀಸ್ ಬಂದೋಬಸ್ತ್ ಮತ್ತು ಕಠಿಣ ಭದ್ರತಾ ಕ್ರಮಗಳ ನಡುವೆಯೇ ಆರ್‌.ಎಸ್‌.ಎಸ್ ಪಥಸಂಚಲನವು ಶಿಸ್ತಿನಿಂದ ಮತ್ತು ಯಶಸ್ವಿಯಾಗಿ ಇಂದು ನೆರವೇರಿತು. ಸುಮಾರು 300 ಗಣವೇಶಧಾರಿಗಳು ಹಾಗೂ 50 ಘೋಷ್ ವಾದಕರು ಭಾಗವಹಿಸಿದ ಈ ಪಥಸಂಚಲನವನ್ನು ಪೊಲೀಸರು ಸಂಪೂರ್ಣ ಸರ್ಪಗಾವಲಿನಲ್ಲಿ ಕರೆದೊಯ್ದರು.

ಪಥಸಂಚಲನವು ಪಟ್ಟಣದ ಬಜಾಜ್ ಕಲ್ಯಾಣ ಮಂಟಪದಿಂದ ಪ್ರಾರಂಭವಾಗಿ ಬಸವೇಶ್ವರ ವೃತ್ತ, ಬಸ್ ನಿಲ್ದಾಣ ವೃತ್ತ, ಅಂಬೇಡ್ಕರ್ ವೃತ್ತ, ರಾಘವೇಂದ್ರ ಖಾನಾವಳಿ, ಕೆನರಾ ಬ್ಯಾಂಕ್, ತಾಪಂ ಕಚೇರಿ ವೃತ್ತ ಮಾರ್ಗವಾಗಿ ಪುನಃ ಬಜಾಜ್ ಮಂಟಪಕ್ಕೆ ತಲುಪಿತು.

ಮೆರವಣಿಗೆಯ ಅವಧಿಯಲ್ಲಿ ಸಾವಿರಾರು ಜನರು “ಭಾರತ್ ಮಾಥಾಕಿ ಜೈ”, “ವಂದೇ ಮಾತರಂ” ಘೋಷಣೆಗಳನ್ನು ಕೂಗಿದರು. ಪಥಸಂಚಲನದಲ್ಲಿ ನಡೆದ ಶಿಸ್ತಿನ ಪ್ರದರ್ಶನಕ್ಕೆ ಕುಟುಂಬದ ಅನೇಕ ಸದಸ್ಯರು ಗಣವೇಶಧಾರಿಗಳಿಗೆ ಪುಷ್ಪಾರ್ಚನೆ ಮಾಡಿ ಗೌರವ ಸೂಚಿಸಿದರು.

ಭದ್ರತಾ ದೃಷ್ಟಿಯಿಂದ ಪಟ್ಟಣಕ್ಕೆ ಸಂಪರ್ಕಿಸುವ ನಾಲ್ಕೂ ಮುಖ್ಯ ರಸ್ತೆಗಳಲ್ಲೂ ಪೊಲೀಸ್ ನಾಕಾಬಂದಿ ಜಾರಿಗೆ ಬಿದ್ದಿತ್ತು. ಪಟ್ಟಣ ಪ್ರವೇಶಿಸುವ ಎಲ್ಲಾ ವಾಹನಗಳು, ವಿಶೇಷವಾಗಿ ಬಸ್‌ಗಳು, ತಪಾಸಣೆಗೆ ಒಳಪಟ್ಟಿದ್ದವು.

ಪಥಸಂಚಲನದ ಸಂಪೂರ್ಣ ಚಟುವಟಿಕೆಯನ್ನು ಮನಿಟರ್ ಮಾಡಲು 10 ಡ್ರೋನ್ ಕ್ಯಾಮೆರಾಗಳು ನಿಯೋಜಿಸಲಾಗಿತ್ತು. ಪಥಸಂಚಲನದ ಪ್ರತಿಯೊಂದು ಚಲನವಲನವನ್ನು ಸೆರೆಹಿಡಿಯಲು ಡ್ರೋನ್‌ಗಳ ಮೂಲಕ ನಿಗಾ ವಹಿಸಲಾಯಿತು.

ಈ ಸಂದರ್ಭದಲ್ಲಿ ಸಾವಿರಾರು ಪೊಲೀಸ್ ಸಿಬ್ಬಂದಿ, ಸ್ಥಳೀಯ ಮುಖಂಡರು ಹಾಗೂ ಹಲವಾರು ಸಂಘಟನೆಗಳ ಪ್ರತಿನಿಧಿಗಳು ಹಾಜರಿದ್ದರು. ಯಾವುದೇ ಅನಾಹುತಗಳಿಲ್ಲದೆ ಪಥಸಂಚಲನ ಶಾಂತಿಯುತವಾಗಿ ಮುಗಿದಿದ್ದು, ಪೊಲೀಸರು ಹಾಗೂ ಆಯೋಜಕರನ್ನು ಹಲವರು ಅಭಿನಂದಿಸಿದ್ದಾರೆ.