4 ಸಾವಿರ ಶಿಕ್ಷಕರಿಗೆ ಒಪಿಎಸ್ ಭಾಗ್ಯ: ದಶಕಗಳ ಹೋರಾಟಕ್ಕೆ ಕೊನೆಗೂ ಮನ್ನಣೆ

ಬೆಂಗಳೂರು: ನೇಮಕಾತಿ ಅಧಿಸೂಚನೆ ಹೊರಬಂದದ್ದು 2006ರ ಏಪ್ರಿಲ್‌ 1ಕ್ಕೂ ಮುನ್ನ. ಆದರೆ ಆಡಳಿತಾತ್ಮಕ ಹಾಗೂ ತಾಂತ್ರಿಕ ವಿಳಂಬದಿಂದ ಸೇವೆಗೆ ಸೇರಿದದ್ದು ಮಾತ್ರ ನಂತರ. ಈ ಕಾರಣಕ್ಕೆ ಹೊಸ ಪಿಂಚಣಿ ಯೋಜನೆ (NPS)ಗೆ ತಳ್ಳಲ್ಪಟ್ಟಿದ್ದ ರಾಜ್ಯದ ಸುಮಾರು 4 ಸಾವಿರ ಸರ್ಕಾರಿ ಶಿಕ್ಷಕರಿಗೆ ಇದೀಗ ಹಳೆಯ ಪಿಂಚಣಿ ಯೋಜನೆ (OPS) ವ್ಯಾಪ್ತಿಗೆ ಬರುವ ನಿರೀಕ್ಷೆ ಗಟ್ಟಿಯಾಗಿದೆ.

ತಮ್ಮದಲ್ಲದ ಆಡಳಿತಾತ್ಮಕ ವಿಳಂಬಕ್ಕೆ ಶಿಕ್ಷೆಯಾಗುತ್ತಿದೆ ಎಂದು ಆರೋಪಿಸಿ ಹಲವು ವರ್ಷಗಳಿಂದ ಹೋರಾಟ ನಡೆಸುತ್ತಿದ್ದ ಶಿಕ್ಷಕರ ಬೇಡಿಕೆಗೆ ಸರ್ಕಾರ ಸ್ಪಂದಿಸಿದ್ದು, ಅರ್ಹ ಶಿಕ್ಷಕರನ್ನು ಎನ್‌ಪಿಎಸ್‌ನಿಂದ ಒಪಿಎಸ್‌ಗೆ ಬದಲಾಯಿಸುವ ಪ್ರಕ್ರಿಯೆಗೆ ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆ ಮುಂದಾಗಿದೆ ಎಂದು ತಿಳಿದುಬಂದಿದೆ.

ಅಧಿಸೂಚನೆ ಮೊದಲೇ, ಸೇವೆ ಮಾತ್ರ ನಂತರ!

2006ರ ಏಪ್ರಿಲ್‌ 1ಕ್ಕೂ ಮುನ್ನವೇ ನೇಮಕಾತಿ ಅಧಿಸೂಚನೆ ಪ್ರಕಟಗೊಂಡಿತ್ತು. ನೇಮಕಾತಿ ಪ್ರಕ್ರಿಯೆಯಲ್ಲಿನ ವಿವಿಧ ಹಂತಗಳ ವಿಳಂಬದಿಂದಾಗಿ ಅಭ್ಯರ್ಥಿಗಳು ಸರ್ಕಾರಿ ಸೇವೆಗೆ ಸೇರುವ ವೇಳೆಗೆ 2006ರ ಗಡುವು ದಾಟಿತ್ತು.

ಇದನ್ನೇ ಆಧಾರವಾಗಿಸಿಕೊಂಡು ಅವರನ್ನು ಎನ್‌ಪಿಎಸ್‌ ವ್ಯಾಪ್ತಿಗೆ ಸೇರಿಸಲಾಗಿತ್ತು. ಆದರೆ, ನೇಮಕಾತಿಯ ಮೂಲ ದಿನಾಂಕವನ್ನು ಪರಿಗಣಿಸದೆ ಕೇವಲ ಸೇವೆಗೆ ಸೇರಿದ ದಿನಾಂಕವನ್ನೇ ಆಧಾರವಾಗಿಸಿಕೊಂಡಿರುವುದು ಅನ್ಯಾಯ ಎಂದು ಶಿಕ್ಷಕರು ವಾದಿಸುತ್ತಾ ಬಂದಿದ್ದರು.

ಈ ವಿಚಾರದಲ್ಲಿ ಶಿಕ್ಷಕರ ಸಂಘಟನೆಗಳು ಸರ್ಕಾರದ ಮಟ್ಟದಲ್ಲಿ ನಿರಂತರವಾಗಿ ಮನವಿ ಸಲ್ಲಿಸುವುದರ ಜತೆಗೆ ಕಾನೂನು ಹೋರಾಟವನ್ನೂ ನಡೆಸಿದ್ದವು.

ದಾಖಲೆ ಪರಿಶೀಲನೆಗೆ ಸೂಚನೆ

ಪ್ರಕರಣಕ್ಕೆ ಸಂಬಂಧಿಸಿದ ಕಾನೂನು ಮತ್ತು ಆಡಳಿತಾತ್ಮಕ ಅಂಶಗಳನ್ನು ಪರಿಶೀಲಿಸಿರುವ ಇಲಾಖೆ, ಅರ್ಹ ಶಿಕ್ಷಕರ ಸೇವಾ ಪುಸ್ತಕ, ನೇಮಕಾತಿ ಅಧಿಸೂಚನೆ, ಆಯ್ಕೆ ಪಟ್ಟಿ ಹಾಗೂ ಇತರ ದಾಖಲೆಗಳನ್ನು ಪರಿಶೀಲಿಸಿ ನಿಯಮಾನುಸಾರ ಮುಂದಿನ ಕ್ರಮ ಕೈಗೊಳ್ಳುವಂತೆ ಸಂಬಂಧಪಟ್ಟ ಅಧಿಕಾರಿಗಳಿಗೆ ಸೂಚಿಸಿದೆ ಎನ್ನಲಾಗಿದೆ.

ಅರ್ಹತೆ ಹೊಂದಿರುವ ಶಿಕ್ಷಕರನ್ನು ಗುರುತಿಸಿ ಅವರ ಪಿಂಚಣಿ ವ್ಯವಸ್ಥೆ ಬದಲಾಯಿಸುವ ಪ್ರಕ್ರಿಯೆ ಪೂರ್ಣಗೊಳಿಸುವುದು ಮುಂದಿನ ಪ್ರಮುಖ ಹಂತವಾಗಿದೆ.

‘ತಡವಾದ ನೇಮಕ ನಮ್ಮ ತಪ್ಪಲ್ಲ’

ವರ್ಷಗಳ ಕಾಲ ಸೇವೆ ಸಲ್ಲಿಸಿ ನಿವೃತ್ತಿಯ ಅಂಚಿನಲ್ಲಿರುವ ಶಿಕ್ಷಕರಿಗೆ ಪಿಂಚಣಿ ವಿಚಾರ ದೊಡ್ಡ ಆತಂಕವಾಗಿತ್ತು. ನೇಮಕಾತಿ ಪ್ರಕ್ರಿಯೆಯಲ್ಲಿನ ವಿಳಂಬಕ್ಕೆ ಶಿಕ್ಷಕರನ್ನೇ ಹೊಣೆ ಮಾಡುವುದು ಸರಿಯಲ್ಲ ಎಂಬ ವಾದ ಶಿಕ್ಷಕರ ವಲಯದಲ್ಲಿ ಬಲವಾಗಿ ಕೇಳಿಬಂದಿತ್ತು.

“ಅಧಿಸೂಚನೆ 2006ಕ್ಕೂ ಮೊದಲೇ ಹೊರಬಿದ್ದಿತ್ತು. ಸರ್ಕಾರದ ನೇಮಕಾತಿ ಪ್ರಕ್ರಿಯೆ ವಿಳಂಬವಾದರೆ ಅದರ ಹೊಣೆಯನ್ನು ಅಭ್ಯರ್ಥಿಗಳ ಮೇಲೆ ಹಾಕುವುದು ನ್ಯಾಯಸಮ್ಮತವಲ್ಲ” ಎಂಬುದು ಶಿಕ್ಷಕರ ಪ್ರಮುಖ ವಾದವಾಗಿತ್ತು.

ಸುದೀರ್ಘ ಹೋರಾಟಕ್ಕೆ ಸಿಕ್ಕ ಫಲ

ಈ ಬೆಳವಣಿಗೆಯಿಂದ ಹಲವು ವರ್ಷಗಳಿಂದ ಒಪಿಎಸ್‌ಗಾಗಿ ಹೋರಾಟ ನಡೆಸುತ್ತಿದ್ದ ಶಿಕ್ಷಕರಲ್ಲಿ ಸಂತಸ ಮೂಡಿದೆ. ನಿವೃತ್ತಿ ಜೀವನದ ಆರ್ಥಿಕ ಭದ್ರತೆ ಕುರಿತು ಎದುರಾಗಿದ್ದ ಅನಿಶ್ಚಿತತೆ ದೂರವಾಗುವ ನಿರೀಕ್ಷೆ ವ್ಯಕ್ತವಾಗಿದೆ.

ಈ ಹಿಂದೆ 2006ರ ಏಪ್ರಿಲ್‌ 1ಕ್ಕೂ ಮುನ್ನ ನೇಮಕಾತಿ ಅಧಿಸೂಚನೆ ಹೊರಡಿಸಿ, ನಂತರ ಸೇವೆಗೆ ಸೇರಿದ ಸರ್ಕಾರಿ ನೌಕರರಿಗೆ ಒಪಿಎಸ್‌ ಆಯ್ಕೆ ನೀಡುವ ಸಂಬಂಧ ರಾಜ್ಯ ಸರ್ಕಾರ ಅಧಿಕೃತ ಕ್ರಮ ಕೈಗೊಂಡಿತ್ತು.

4 ಸಾವಿರ ಶಿಕ್ಷಕರ ಕಣ್ಣು ಈಗ ಅಂತಿಮ ಆದೇಶದತ್ತ

ಸರ್ಕಾರದ ಮಟ್ಟದಲ್ಲಿ ಪ್ರಕ್ರಿಯೆ ಮುಂದುವರಿದಿರುವ ಬೆನ್ನಲ್ಲೇ, ಅರ್ಹ ಶಿಕ್ಷಕರಿಗೆ ಯಾವುದೇ ಗೊಂದಲವಿಲ್ಲದೆ, ವಿಳಂಬವಿಲ್ಲದೆ ಒಪಿಎಸ್‌ ಸೌಲಭ್ಯ ಕಲ್ಪಿಸುವ ಅಂತಿಮ ಆದೇಶ ಹೊರಬೀಳಬೇಕು ಎಂಬ ಒತ್ತಾಯವೂ ಕೇಳಿಬರುತ್ತಿದೆ.

ದಶಕಗಳ ಹೋರಾಟದ ಬಳಿಕ ಸರ್ಕಾರದ ನಿರ್ಧಾರ ಶಿಕ್ಷಕರ ಪಾಲಿಗೆ ಮಹತ್ವದ ಬೆಳವಣಿಗೆಯಾಗಿದ್ದು, ಇದೀಗ ದಾಖಲೆ ಪರಿಶೀಲನೆ ಹಾಗೂ ಅಂತಿಮ ಅನುಷ್ಠಾನ ಪ್ರಕ್ರಿಯೆ ಎಷ್ಟು ವೇಗವಾಗಿ ನಡೆಯಲಿದೆ ಎಂಬುದು ಕುತೂಹಲ ಮೂಡಿಸಿದೆ.