ಬೆಂಗಳೂರು: ‘ಬಿಗ್ಬಾಸ್ ಕನ್ನಡ ಸೀಸನ್‌ 13’ರ ಮನೆಯಲ್ಲಿ ಈ ವಾರದ ಆಟಕ್ಕೆ ಹೊಸ ತಿರುವು ಸಿಕ್ಕಿದೆ. ಬಿಡುಗಡೆಯಾಗಿರುವ ಹೊಸ ಪ್ರೋಮೋದಲ್ಲಿ ನಿರೂಪಕ ಕಿಚ್ಚ ಸುದೀಪ್‌ ಅವರು ಎಲಿಮಿನೇಷನ್‌ ಪ್ರಕ್ರಿಯೆ ಕುರಿತು ನೀಡಿರುವ ಸೂಚನೆಗಳು ಸ್ಪರ್ಧಿಗಳಲ್ಲಿ ಆತಂಕ ಮೂಡಿಸಿವೆ.
ಈ ವಾರ ಮನೆಯಲ್ಲಿರುವ ಎಲ್ಲ ಸ್ಪರ್ಧಿಗಳೂ ನಾಮಿನೇಷನ್‌ ಎದುರಿಸಬೇಕಾಗುತ್ತದೆ ಎಂದು ಸುದೀಪ್‌ ತಿಳಿಸಿದ್ದಾರೆ. ಹೀಗಾಗಿ ಯಾರು ಮನೆಯಲ್ಲಿ ಮುಂದುವರಿಯುತ್ತಾರೆ ಎಂಬುದಕ್ಕೆ ಖಚಿತತೆ ಇಲ್ಲ ಎಂಬ ಸಂದೇಶವನ್ನು ಅವರು ನೀಡಿದ್ದಾರೆ.
ವೀಕ್ಷಕರ ಮತದಾನಕ್ಕೆ ಮಾತ್ರ ಸೀಮಿತವಾಗದೆ, ಸ್ಪರ್ಧಿಗಳನ್ನು ನೇರವಾಗಿ ನಾಮಿನೇಟ್‌ ಮಾಡುವ ಪ್ರಕ್ರಿಯೆಯೂ ಇರಲಿದೆ ಎಂದು ಪ್ರೋಮೋದಲ್ಲಿ ಸೂಚಿಸಲಾಗಿದೆ. ಯಾವುದೇ ಸಮಯದಲ್ಲಿ ಪರಿಸ್ಥಿತಿ ಬದಲಾಗುವ ಸಾಧ್ಯತೆ ಇರುವುದರಿಂದ ಎಲ್ಲರೂ ‘ಎಮರ್ಜೆನ್ಸಿ ಎಕ್ಸಿಟ್‌’ಗೆ ಸಿದ್ಧರಾಗಿರಬೇಕು ಎಂದು ಸುದೀಪ್‌ ಎಚ್ಚರಿಕೆ ನೀಡಿದ್ದಾರೆ.
ಈ ಘೋಷಣೆಯ ಬಳಿಕ ಮನೆಯ ಹಲವು ಸ್ಪರ್ಧಿಗಳಲ್ಲಿ ಆತಂಕ ಕಾಣಿಸಿಕೊಂಡಿದೆ. ಇದುವರೆಗೆ ತಮ್ಮ ಆಟದ ಮೇಲೆ ಗಮನಹರಿಸಿದ್ದ ಸ್ಪರ್ಧಿಗಳಿಗೆ ಇದೀಗ ಯಾವ ಕ್ಷಣದಲ್ಲಿ ನಾಮಿನೇಷನ್‌ ಅಥವಾ ಎಲಿಮಿನೇಷನ್‌ ಎದುರಾಗಬಹುದು ಎಂಬ ಗೊಂದಲ ಶುರುವಾಗಿದೆ.
ಹೊಸ ನಿಯಮದಿಂದ ಈ ವಾರದ ಆಟದ ಲೆಕ್ಕಾಚಾರ ಬದಲಾಗುವ ಸಾಧ್ಯತೆ ಇದೆ. ಯಾರು ಸುರಕ್ಷಿತ, ಯಾರು ಅಪಾಯದಲ್ಲಿದ್ದಾರೆ ಎಂಬುದು ಕೊನೆಯ ಕ್ಷಣದವರೆಗೂ ಸ್ಪಷ್ಟವಾಗದ ಪರಿಸ್ಥಿತಿ ನಿರ್ಮಾಣವಾಗುವ ಸಾಧ್ಯತೆಯಿದೆ. ಹೀಗಾಗಿ ಈ ವಾರ ಯಾರ ಪ್ರಯಾಣಕ್ಕೆ ಬ್ರೇಕ್‌ ಬೀಳಲಿದೆ ಎಂಬ ಕುತೂಹಲ ವೀಕ್ಷಕರಲ್ಲಿ ಹೆಚ್ಚಾಗಿದೆ.
