ಭಾಗ–3
ಜೀವನದಲ್ಲಿ ನಮ್ಮನ್ನು ಪ್ರೀತಿಸುವವರಿಗಿಂತ, ನಮ್ಮನ್ನು ಟೀಕಿಸುವವರು, ವಿರೋಧಿಸುವವರು ಮತ್ತು ನಮ್ಮ ಬೆಳವಣಿಗೆಯನ್ನು ಸಹಿಸದವರು ಕೆಲವೊಮ್ಮೆ ಹೆಚ್ಚು ಕಾಣಿಸಿಕೊಳ್ಳುತ್ತಾರೆ. ನಾವು ಒಂದು ಹೆಜ್ಜೆ ಮುಂದೆ ಇಟ್ಟಾಗ ಪ್ರಶ್ನಿಸುವವರು, ಒಂದು ನಿರ್ಧಾರ ತೆಗೆದುಕೊಂಡಾಗ ದೋಷ ಹುಡುಕುವವರು, ಯಶಸ್ಸಿನತ್ತ ಸಾಗುತ್ತಿರುವಾಗ ಕಾಲೆಳೆಯುವವರು ಎದುರಾಗುವುದು ಸಹಜ.
ಆದರೆ ಅಂತಹವರನ್ನು ಕಂಡು ಭಯಪಡುವ ಅಗತ್ಯವಿಲ್ಲ.
ಬದಲಿಗೆ, ಅವರನ್ನು ಅರ್ಥಮಾಡಿಕೊಳ್ಳುವ ಬುದ್ಧಿವಂತಿಕೆ, ಅವರ ಮಾತಿನಿಂದ ಕಲಿಯುವ ಮನಸ್ಸು ಮತ್ತು ಅವರ ವಿರೋಧವನ್ನೇ ನಮ್ಮ ಬೆಳವಣಿಗೆಗೆ ಮೆಟ್ಟಿಲಾಗಿಸಿಕೊಳ್ಳುವ ದೃಢಸಂಕಲ್ಪ ನಮ್ಮಲ್ಲಿರಬೇಕು.
ನಮ್ಮ ಪ್ರತಿಸ್ಪರ್ಧಿಗಳು ಅಥವಾ ವಿರೋಧಿಗಳು ಸಾಮಾನ್ಯವಾಗಿ ಮಾಡುವ ಮೊದಲ ಕೆಲಸ ನಮ್ಮ ಪ್ರತಿಯೊಂದು ನಡೆ, ನುಡಿ ಮತ್ತು ನಿರ್ಧಾರದಲ್ಲಿ ದೋಷ ಹುಡುಕುವುದು. ಮೊದಲು ನಮ್ಮ ಆಪ್ತ ವಲಯದಲ್ಲಿ ನಮ್ಮ ಬಗ್ಗೆ ತಪ್ಪು ಅಭಿಪ್ರಾಯ ಮೂಡಿಸಲು ಪ್ರಯತ್ನಿಸುತ್ತಾರೆ. ಅದರಿಂದಲೂ ನಾವು ಕುಗ್ಗದಿದ್ದರೆ, ನಿಧಾನವಾಗಿ ಸಾರ್ವಜನಿಕವಾಗಿ ನಮ್ಮನ್ನು ಕೆಟ್ಟದಾಗಿ ಚಿತ್ರಿಸಲು ಮತ್ತು ನಮ್ಮ ಪ್ರತಿಷ್ಠೆಗೆ ಧಕ್ಕೆ ತರಲು ಪ್ರಯತ್ನಿಸಬಹುದು.
ಇಂತಹ ಸಂದರ್ಭಗಳಲ್ಲಿ ಆತುರದಿಂದ ಪ್ರತಿಕ್ರಿಯಿಸುವುದು ಜಾಣತನವಲ್ಲ.
ಸೂಕ್ಷ್ಮವಾಗಿ ಗಮನಿಸಬೇಕು.
ಆತುರಪಡಬಾರದು.
ಮಾತಿನ ಹಿಂದೆ ಇರುವ ಉದ್ದೇಶವನ್ನು ಅರ್ಥಮಾಡಿಕೊಳ್ಳಬೇಕು.
ಆದರೆ ಯಾವುದೇ ಕಾರಣಕ್ಕೂ ಧೈರ್ಯ ಕಳೆದುಕೊಳ್ಳಬಾರದು.
ಇಲ್ಲಿ ಸಂತಕವಿ ಕನಕದಾಸರ ಮನೋಭಾವ ನಮಗೆ ದಾರಿದೀಪವಾಗುತ್ತದೆ:
“ಹಿಂದೆ ನನ್ನ ಬೈದವರೆಲ್ಲ ಚಂದಾಗಿರಲಿ,
ಮುಂದೆ ಎನ್ನ ಬೈಯುವರೆಲ್ಲ ಅಂದಣ ಏರಲಿ.
ಏನು ವಲ್ಲೆ ಹರಿಯೇ, ನಿನ್ನ ಸ್ತುತಿಸಿ ಕೇಳುವುದು;
ಜ್ಞಾನ ಭಕ್ತಿ ಕೊಡು ನನಗೆ, ಅದುವೇ ದೊಡ್ಡದು.”
ಇದು ಕೇವಲ ಒಂದು ಭಕ್ತಿಯ ಮಾತಲ್ಲ. ಜೀವನವನ್ನು ನೋಡುವ ಒಂದು ದೊಡ್ಡ ದೃಷ್ಟಿಕೋನ.
ನಮ್ಮನ್ನು ನಿಂದಿಸುವವರಿಗೂ ಒಳ್ಳೆಯದಾಗಲಿ ಎಂದು ಬಯಸುವ ಮನಸ್ಸು ಬೆಳೆಸಿಕೊಳ್ಳುವುದು ಸುಲಭವಲ್ಲ. ಆದರೆ ಅದನ್ನು ಸಾಧಿಸಿದಾಗ ನಮ್ಮ ಮನಸ್ಸು ವಿರೋಧಿಗಳಿಗಿಂತ ದೊಡ್ಡದಾಗುತ್ತದೆ.
ನಿಮ್ಮ ನಿಂದಕರಿಗೂ, ಪ್ರತಿಸ್ಪರ್ಧಿಗಳಿಗೂ, ವಿರೋಧಿಗಳಿಗೂ ಮತ್ತು ಹಿತಶತ್ರುಗಳಿಗೂ ಕಾಯಾ, ವಾಚಾ, ಮನಸಾ ಒಳ್ಳೆಯದಾಗಲಿ ಎಂದು ಬಯಸಿ. ಅದು ಕೇವಲ ಬಾಯಿಮಾತಾಗಿರಬಾರದು. ನಿಮ್ಮ ನಡೆ-ನುಡಿಯಲ್ಲೂ ಅದು ಪ್ರತಿಫಲಿಸಬೇಕು.
ಅವಶ್ಯಕತೆ ಬಂದಾಗ ನಿಮ್ಮ ಆಪ್ತರ ಎದುರಲ್ಲಾಗಲಿ, ಸಾರ್ವಜನಿಕ ವೇದಿಕೆಯಲ್ಲಾಗಲಿ, ನಿಮ್ಮ ವಿರೋಧಿಯಲ್ಲಿರುವ ಒಳ್ಳೆಯ ಗುಣ, ಪರಿಶ್ರಮ, ಪ್ರತಿಭೆ ಮತ್ತು ಸ್ಪರ್ಧಾ ಮನೋಭಾವವನ್ನು ಪ್ರಾಮಾಣಿಕವಾಗಿ ಪ್ರಶಂಸಿಸಿ.
ಇದು ನಿಮ್ಮನ್ನು ದುರ್ಬಲಗೊಳಿಸುವುದಿಲ್ಲ.
ಬದಲಿಗೆ, ನಿಮ್ಮ ವಿರೋಧಿಯ ಮನಸ್ಸಿನಲ್ಲೇ ಒಂದು ಪ್ರಶ್ನೆ ಮೂಡಿಸುತ್ತದೆ:
“ನಾನು ಈ ವ್ಯಕ್ತಿಯನ್ನು ತಪ್ಪಾಗಿ ಅರ್ಥಮಾಡಿಕೊಂಡೆನೇ?”
ಆ ಪ್ರಶ್ನೆಯೇ ನಿಮ್ಮ ಮೊದಲ ಗೆಲುವು.
ನಿಮ್ಮ ಬಗ್ಗೆ ತಪ್ಪು ಅಭಿಪ್ರಾಯ ಹೊಂದಿದ್ದವರಲ್ಲೂ ನಿಧಾನವಾಗಿ ಗೌರವ ಮೂಡುತ್ತದೆ. ನಿಮ್ಮ ವಿರೋಧಿಯೊಂದಿಗೆ ಇರುವವರೂ ನಿಮ್ಮ ವ್ಯಕ್ತಿತ್ವವನ್ನು ಗಮನಿಸಲು ಆರಂಭಿಸುತ್ತಾರೆ. ಒಂದು ಹಂತದಲ್ಲಿ ನಿಮ್ಮ ಮಾತು, ನಡೆ ಮತ್ತು ವ್ಯಕ್ತಿತ್ವವೇ ನಿಮ್ಮ ಪರವಾಗಿ ಮಾತನಾಡುವ ಪರಿಸ್ಥಿತಿ ನಿರ್ಮಾಣವಾಗುತ್ತದೆ.
ಆದರೆ ಈ ಎಲ್ಲದರ ನಡುವೆ ಒಂದು ವಿಷಯವನ್ನು ಮಾತ್ರ ಮರೆಯಬಾರದು.
ನಿಮ್ಮ ಮುನ್ನಡೆಯನ್ನು ಯಾವತ್ತೂ ನಿಲ್ಲಿಸಬೇಡಿ.
ನಿಮ್ಮ ಮಾತೇ ನಿಮ್ಮ ವ್ಯಕ್ತಿತ್ವದ ಕನ್ನಡಿ
ಮನುಷ್ಯನ ವ್ಯಕ್ತಿತ್ವವನ್ನು ತಿಳಿದುಕೊಳ್ಳಲು ಅವನ ಮಾತುಗಳನ್ನು ಗಮನಿಸಿದರೆ ಸಾಕು.
ಬಸವಣ್ಣನವರ ವಚನದ ಈ ಸಾಲುಗಳು ಪ್ರತಿಯೊಬ್ಬರಿಗೂ ಜೀವನದ ಮಾರ್ಗದರ್ಶನ ನೀಡುವಂತಿವೆ:
“ನುಡಿದರೆ ಮುತ್ತಿನ ಹಾರದಂತಿರಬೇಕು,
ನುಡಿದರೆ ಮಾಣಿಕ್ಯದ ದೀಪ್ತಿಯಂತಿರಬೇಕು,
ನುಡಿದರೆ ಸ್ಫಟಿಕದ ಶಲಾಕೆಯಂತಿರಬೇಕು,
ನುಡಿದರೆ ಲಿಂಗ ಮೆಚ್ಚಿ ಅಹುದೆನಬೇಕು.
ನುಡಿಯೊಳಗಾಗಿ ನಡೆಯದಿದ್ದರೆ
ಕೂಡಲಸಂಗಮದೇವನೆಂತೊಲಿವನಯ್ಯ?”
ನಾವು ಯಾರ ಬಗ್ಗೆಯೂ ವೈಯಕ್ತಿಕವಾಗಿ ನಕಾರಾತ್ಮಕವಾಗಿ ಮಾತನಾಡಬಾರದು. ನಮಗೆ ತಿಳಿದಿರುವ ವಿಷಯಗಳ ಬಗ್ಗೆ ಸಾಧ್ಯವಾದಷ್ಟು ಸಕಾರಾತ್ಮಕವಾಗಿ ಮಾತನಾಡಬೇಕು.
ಯಾರನ್ನಾದರೂ ಟೀಕಿಸಬೇಕಾದ ಸಂದರ್ಭ ಬಂದರೆ, ವ್ಯಕ್ತಿಯನ್ನು ಗುರಿಯಾಗಿಸದೆ, ವಿಷಯವನ್ನು ಆಧಾರವಾಗಿಟ್ಟುಕೊಂಡು ಟೀಕಿಸಬೇಕು.
ಅನಗತ್ಯ ಪದಗಳನ್ನು ಬಳಸಬಾರದು. ನಮ್ಮ ವಿರೋಧಿ ಅಥವಾ ಪ್ರತಿಸ್ಪರ್ಧಿಯನ್ನು ಟೀಕಿಸುವ ಸಂದರ್ಭದಲ್ಲೂ ಗೌರವದ ಭಾಷೆಯನ್ನೇ ಬಳಸಬೇಕು.
ಏಕೆಂದರೆ ನಾವು ಆಡುವ ಪ್ರತಿಯೊಂದು ಶಬ್ದವೂ ನಮ್ಮ ವ್ಯಕ್ತಿತ್ವದ ಪರಿಚಯ ನೀಡುತ್ತದೆ.
ನಮ್ಮ ಮಾತುಗಳಿಂದ ನಮ್ಮ ಮನೋಭಾವ, ಸಂಸ್ಕಾರ, ಕುಟುಂಬದಿಂದ ಪಡೆದ ಮೌಲ್ಯಗಳು ಮತ್ತು ಜೀವನದಲ್ಲಿ ಕಲಿತ ಪಾಠಗಳು ಸಾರ್ವಜನಿಕರಿಗೆ ಅರ್ಥವಾಗುತ್ತವೆ.
ಹೀಗಾಗಿ ಎದುರಾಳಿಯನ್ನು ಕೆಳಗೆಳೆಯಲು ಬಳಸಿದ ಒಂದು ಕೆಟ್ಟ ಪದ, ಎದುರಾಳಿಗಿಂತ ಮೊದಲು ನಮ್ಮನ್ನೇ ಕೆಳಗೆಳೆಯಬಹುದು.
ವಿರೋಧಿಗಳನ್ನು ಏಕೆ ಗೌರವಿಸಬೇಕು?
ನಮ್ಮ ವಿರೋಧಿಗಳು ನಮ್ಮ ಹೆಸರನ್ನು ಸಾರ್ವಜನಿಕ ಚರ್ಚೆಯಲ್ಲಿಡುತ್ತಾರೆ.
ಅವರು ನಮ್ಮ ಬಗ್ಗೆ ಮಾತನಾಡುವಷ್ಟೂ ನಮ್ಮ ಹೆಸರು ಜನರಿಗೆ ತಲುಪುತ್ತದೆ. ಆದರೆ ಅದಕ್ಕಿಂತ ಮುಖ್ಯವಾದ ಮತ್ತೊಂದು ಸಂಗತಿಯಿದೆ.
ನಮ್ಮನ್ನು ಗುರಿಯಾಗಿಸಿಕೊಂಡು ಟೀಕಿಸುವ ವ್ಯಕ್ತಿ, ಕೆಲವೊಮ್ಮೆ ನಮಗೆ ಕಾಣದಿರುವ ನಮ್ಮ ತಪ್ಪುಗಳನ್ನು ತೋರಿಸಬಹುದು.
ಅವರು ಮಾಡುವ ಪ್ರತಿಯೊಂದು ಟೀಕೆಯೂ ಸತ್ಯವಾಗಿರಬೇಕೆಂದಿಲ್ಲ. ಆದರೆ ಅವರ ಮಾತಿನಲ್ಲಿ ಸತ್ಯದ ಒಂದು ಸಣ್ಣ ಅಂಶವಿದ್ದರೂ ಅದನ್ನು ಗುರುತಿಸಿ ಸರಿಪಡಿಸಿಕೊಳ್ಳುವ ಸಾಮರ್ಥ್ಯ ನಮ್ಮಲ್ಲಿರಬೇಕು.
ಆದ್ದರಿಂದ ಸತ್ಯವಾದ ಟೀಕೆಯನ್ನು ಸ್ವೀಕರಿಸುವ ಮನಸ್ಸು ಬೆಳೆಸಿಕೊಳ್ಳಬೇಕು.
ನಮ್ಮ ತಪ್ಪುಗಳನ್ನು ಗುರುತಿಸಿ ಹೇಳುವವರೆಲ್ಲರೂ ನಮ್ಮ ಶತ್ರುಗಳೇ ಆಗಬೇಕೆಂದಿಲ್ಲ. ಕೆಲವೊಮ್ಮೆ ಅವರು ನಮ್ಮ ಬೆಳವಣಿಗೆಗೆ ಉಚಿತವಾಗಿ ಕೆಲಸ ಮಾಡುವ ಕನ್ನಡಿಯಂತೆ.
ನಾವು ಕನ್ನಡಿಯಲ್ಲಿ ಮುಖ ನೋಡಿದಾಗ ಮುಖದ ಮೇಲೆ ಇರುವ ಕಲೆ ಕಾಣುತ್ತದೆ. ಕಲೆ ಕಾಣಿಸಿಕೊಂಡಿದ್ದಕ್ಕೆ ಕನ್ನಡಿಯನ್ನು ದೂಷಿಸುವುದಿಲ್ಲ. ಅದನ್ನು ಸ್ವಚ್ಛಗೊಳಿಸಲು ಪ್ರಯತ್ನಿಸುತ್ತೇವೆ.
ಅದೇ ರೀತಿ ನಮ್ಮ ತಪ್ಪುಗಳನ್ನು ಯಾರಾದರೂ ತೋರಿಸಿದಾಗ, ಮೊದಲು ಅದರಲ್ಲಿ ಎಷ್ಟು ಸತ್ಯವಿದೆ ಎಂದು ಪರಿಶೀಲಿಸಬೇಕು.
ಸತ್ಯವಿದ್ದರೆ ತಿದ್ದಿಕೊಳ್ಳಬೇಕು.
ಸುಳ್ಳಿದ್ದರೆ ಮೌನವಾಗಿ ಬಿಟ್ಟುಬಿಡಬೇಕು.
ಅದರ ಬದಲಿಗೆ ಪ್ರತಿಯೊಂದು ಟೀಕೆಗೆ ಉತ್ತರ ಕೊಡುತ್ತಾ ಕುಳಿತರೆ, ನಮ್ಮ ಗುರಿಯತ್ತ ಸಾಗಲು ನಮಗೆ ಸಮಯವೇ ಉಳಿಯುವುದಿಲ್ಲ.
“ನಾನು ತಪ್ಪು ಮಾಡುವುದಿಲ್ಲ” ಎಂಬ ಭ್ರಮೆಯಿಂದ ಹೊರಬನ್ನಿ
ಪ್ರತಿಯೊಬ್ಬ ಮನುಷ್ಯನೂ ತಪ್ಪು ಮಾಡುತ್ತಾನೆ.
ಯಾರೂ ಪರಿಪೂರ್ಣರಲ್ಲ.
ಆದ್ದರಿಂದ,
“ನಾನು ಎಂದಿಗೂ ತಪ್ಪು ಮಾಡುವುದಿಲ್ಲ”
ಎಂಬ ಭ್ರಮೆಯ ಬದಲು,
“ನನ್ನ ತಪ್ಪನ್ನು ಗುರುತಿಸಿ, ಅದನ್ನು ತಿದ್ದಿಕೊಂಡು, ನಿನ್ನೆಗಿಂತ ಇಂದು ಉತ್ತಮವಾಗಬೇಕು”
ಎಂಬ ಮನೋಭಾವ ನಮ್ಮಲ್ಲಿರಬೇಕು.
ನಿಜವಾದ ಬೆಳವಣಿಗೆ ಎಂದರೆ ಇದೇ.
ತಪ್ಪು ಮಾಡದಿರುವುದು ದೊಡ್ಡ ಸಾಧನೆಯಲ್ಲ. ಮಾಡಿದ ತಪ್ಪಿನಿಂದ ಕಲಿತು ಮತ್ತೆ ಅದೇ ತಪ್ಪು ಮರುಕಳಿಸದಂತೆ ಬದುಕುವುದು ದೊಡ್ಡ ಸಾಧನೆ.
ಕಾಲ ಯಾರ ಅಧೀನದಲ್ಲೂ ಇಲ್ಲ
ನಿಮ್ಮ ಟೀಕಾಕಾರರನ್ನು, ವಿರೋಧಿಗಳನ್ನು ಅಥವಾ ಪ್ರತಿಸ್ಪರ್ಧಿಗಳನ್ನು ಕಂಡು ಭಯಪಡುವ ಅಗತ್ಯವಿಲ್ಲ.
ನೀವು ಇಂದು ಸಾಧಿಸಿರುವುದು ದೊಡ್ಡದಾಗಿರಬಹುದು. ಆದರೆ ಇನ್ನೂ ಬಹಳ ದೂರ ಸಾಗಬೇಕಿದೆ, ಇನ್ನೂ ಹೆಚ್ಚಿನದನ್ನು ಸಾಧಿಸಬೇಕಿದೆ ಎಂಬ ಅರಿವು ಸದಾ ನಿಮ್ಮಲ್ಲಿರಬೇಕು.
ಕಾಲ ನಿಂತ ನೀರಲ್ಲ.
ಇಂದು ಕೆಳಗಿರುವವನು ನಾಳೆ ಮೇಲೇರಬಹುದು. ಇಂದು ಮೇಲಿರುವವನು ನಾಳೆ ಕೆಳಗಿಳಿಯಬಹುದು.
ಆದ್ದರಿಂದ ಸ್ಥಾನಮಾನ, ಅಧಿಕಾರ, ಜನಪ್ರಿಯತೆ ಅಥವಾ ಯಶಸ್ಸು ಯಾವುದನ್ನೂ ಶಾಶ್ವತವೆಂದು ಭಾವಿಸಬಾರದು.
ಇಂದಿನ ಯಶಸ್ಸನ್ನು ನಾಳೆಯ ಅಹಂಕಾರವನ್ನಾಗಿ ಮಾಡಿಕೊಳ್ಳಬಾರದು.
ವಿರೋಧ ಹೆಚ್ಚಾದಾಗ ಎಚ್ಚರ ಹೆಚ್ಚಬೇಕು.
ಸ್ಪರ್ಧೆ ಹೆಚ್ಚಾದಾಗ ಪರಿಶ್ರಮ ಹೆಚ್ಚಬೇಕು.
ಟೀಕೆ ಹೆಚ್ಚಾದಾಗ ಆತ್ಮಪರಿಶೀಲನೆ ಹೆಚ್ಚಬೇಕು.
ಆಗ ಮಾತ್ರ ಬೆಳವಣಿಗೆ ನಿರಂತರವಾಗಿರುತ್ತದೆ.
ಕೂಪಮಂಡೂಕವಾಗಬಾರದು
ಒಂದು ಬಾವಿಯೊಳಗೆ ಬದುಕುವ ಕಪ್ಪೆಗೆ ಆ ಬಾವಿಯೇ ಇಡೀ ಪ್ರಪಂಚವೆಂದು ಅನಿಸುತ್ತದೆ. ಸಮುದ್ರದ ವಿಶಾಲತೆ ಅದರ ಕಲ್ಪನೆಗೂ ಬರುವುದಿಲ್ಲ.
ಅದಕ್ಕಾಗಿಯೇ “ಕೂಪಮಂಡೂಕ” ಎಂಬ ಮಾತು ಬಂದಿದೆ.
ನಮ್ಮ ಬದುಕೂ ಹಾಗಾಗಬಾರದು.
ನಮ್ಮ ಸುತ್ತಲಿರುವವರ ಹೊಗಳಿಕೆಯನ್ನೇ ಕೇಳುತ್ತಾ, ನಮ್ಮನ್ನು ಟೀಕಿಸುವವರ ಮಾತನ್ನು ಸಂಪೂರ್ಣವಾಗಿ ತಳ್ಳಿಹಾಕಿದರೆ, ನಾವೂ ಒಂದು ರೀತಿಯಲ್ಲಿ ಕೂಪಮಂಡೂಕಗಳಾಗುತ್ತೇವೆ.
ನಮ್ಮನ್ನು ಹೊಗಳುವವರ ಮಾತು ಕೇಳುವುದು ಸುಖ.
ಆದರೆ ನಮ್ಮ ತಪ್ಪನ್ನು ತೋರಿಸುವವರ ಮಾತು ಕೇಳುವುದು ಬೆಳವಣಿಗೆ.
ಆದ್ದರಿಂದ ಟೀಕೆಯನ್ನು ಸಂಪೂರ್ಣವಾಗಿ ತಳ್ಳಿಹಾಕಬೇಡಿ. ಅದೇ ಸಮಯದಲ್ಲಿ ಪ್ರತಿಯೊಂದು ಟೀಕೆಯನ್ನೂ ಸತ್ಯವೆಂದು ಒಪ್ಪಿಕೊಳ್ಳಬೇಡಿ.
ಅವರ ಮಾತಿನಲ್ಲಿ ಸತ್ಯವಿದ್ದರೆ ಸ್ವೀಕರಿಸಿ; ವಿಷವಿದ್ದರೆ ಬಿಟ್ಟುಬಿಡಿ.
ಅವರಿಂದ ಕಲಿಯಿರಿ.
ಆದರೆ ನಿಮ್ಮ ದಾರಿಯನ್ನು ಅವರ ಕೈಗೆ ಒಪ್ಪಿಸಬೇಡಿ.
ವಿರೋಧವೇ ಕೆಲವೊಮ್ಮೆ ದೊಡ್ಡ ಪಾಠ
ಜೀವನದಲ್ಲಿ ನಮಗೆ ಎದುರಾಗುವ ಪ್ರತಿಯೊಬ್ಬ ವ್ಯಕ್ತಿಯೂ ಯಾವುದೋ ಒಂದು ಪಾಠ ಕಲಿಸುತ್ತಾನೆ.
ನಮ್ಮನ್ನು ಪ್ರೀತಿಸುವವರು ನಮಗೆ ಆತ್ಮವಿಶ್ವಾಸ ನೀಡುತ್ತಾರೆ.
ನಮ್ಮನ್ನು ಪ್ರೋತ್ಸಾಹಿಸುವವರು ನಮ್ಮ ಸಾಮರ್ಥ್ಯವನ್ನು ನೆನಪಿಸುತ್ತಾರೆ.
ಆದರೆ ನಮ್ಮನ್ನು ವಿರೋಧಿಸುವವರು ನಮ್ಮ ಸಹನೆ, ಆತ್ಮವಿಶ್ವಾಸ, ನಿರ್ಧಾರ ಸಾಮರ್ಥ್ಯ ಮತ್ತು ವ್ಯಕ್ತಿತ್ವವನ್ನು ಪರೀಕ್ಷಿಸುತ್ತಾರೆ.
ಆದ್ದರಿಂದ ವಿರೋಧ ಎದುರಾದಾಗ,
“ಏಕೆ ನನ್ನ ವಿರುದ್ಧ ಮಾತನಾಡುತ್ತಿದ್ದಾರೆ?”
ಎಂಬ ಪ್ರಶ್ನೆಯೊಂದರಲ್ಲೇ ಸಿಲುಕಿಕೊಳ್ಳಬೇಡಿ.
ಅದರ ಬದಲು,
“ಈ ಪರಿಸ್ಥಿತಿಯಿಂದ ನಾನು ಏನು ಕಲಿಯಬಹುದು?”
ಎಂದು ನಿಮ್ಮನ್ನು ನೀವೇ ಪ್ರಶ್ನಿಸಿಕೊಳ್ಳಿ.
ಆ ಪ್ರಶ್ನೆ ನಿಮ್ಮನ್ನು ದುರ್ಬಲತೆಯಿಂದ ಸಾಮರ್ಥ್ಯದತ್ತ ಕರೆದೊಯ್ಯುತ್ತದೆ.
ಕೊನೆಯ ಮಾತು
ಸ್ಪರ್ಧೆ ಮತ್ತು ವಿರೋಧವನ್ನು ಕಂಡು ಹಿಂದೆ ಸರಿಯುವವರು ತಮ್ಮ ಬೆಳವಣಿಗೆಗೆ ತಾವೇ ಗಡಿ ಹಾಕಿಕೊಳ್ಳುತ್ತಾರೆ.
ವಿರೋಧವಿಲ್ಲದ ಬದುಕು ಸುಲಭವಾಗಿರಬಹುದು. ಆದರೆ ವಿರೋಧವನ್ನು ಎದುರಿಸಿ ಬೆಳೆಯುವ ಬದುಕು ಹೆಚ್ಚು ಗಟ್ಟಿಯಾಗಿರುತ್ತದೆ.
ನಿಮ್ಮ ವಿರೋಧಿಗಳನ್ನು ದ್ವೇಷಿಸಬೇಡಿ. ಪ್ರತಿಸ್ಪರ್ಧಿಗಳನ್ನು ಭಯಪಡಬೇಡಿ. ನಿಂದಕರನ್ನು ಶಪಿಸಬೇಡಿ. ಅವರ ಮಾತಿನಲ್ಲಿ ಸತ್ಯವಿದ್ದರೆ ಸ್ವೀಕರಿಸಿ. ಅದರಲ್ಲಿ ವಿಷವಿದ್ದರೆ ಬಿಟ್ಟುಬಿಡಿ. ಅವರಿಂದ ಕಲಿಯಿರಿ. ಆದರೆ ನಿಮ್ಮ ಗುರಿ ಮತ್ತು ನಿಮ್ಮ ದಾರಿಯನ್ನು ಅವರ ಕೈಗೆ ಒಪ್ಪಿಸಬೇಡಿ.
ನಿಮ್ಮ ಮಾತಿನಲ್ಲಿ ಸಂಸ್ಕಾರ ಇರಲಿ.
ನಿಮ್ಮ ನಡೆನಲ್ಲಿ ಪ್ರಾಮಾಣಿಕತೆ ಇರಲಿ.
ನಿಮ್ಮ ಮನಸ್ಸಿನಲ್ಲಿ ಸಕಾರಾತ್ಮಕತೆ ಇರಲಿ.
ನಿಮ್ಮ ಗುರಿಯಲ್ಲಿ ಸ್ಪಷ್ಟತೆ ಇರಲಿ.
ನಿಮ್ಮ ಪ್ರಯತ್ನದಲ್ಲಿ ನಿರಂತರತೆ ಇರಲಿ.
ಆಗ ನಿಮ್ಮ ವಿರೋಧಿಗಳೇ ಒಂದು ದಿನ ನಿಮ್ಮ ಬೆಳವಣಿಗೆಯ ಸಾಕ್ಷಿಗಳಾಗುತ್ತಾರೆ.
ಬದುಕಿನಲ್ಲಿ ಗೆಲುವು ಎಂದರೆ ವಿರೋಧಿಗಳನ್ನು ಸೋಲಿಸುವುದು ಮಾತ್ರವಲ್ಲ.
ಅವರ ವಿರೋಧದ ನಡುವೆಯೂ ನಮ್ಮ ವ್ಯಕ್ತಿತ್ವವನ್ನು ಕಳೆದುಕೊಳ್ಳದೆ, ನಮ್ಮ ಗುರಿಯಿಂದ ವಿಚಲಿತರಾಗದೆ ಮುಂದೆ ಸಾಗುವುದು ನಿಜವಾದ ಗೆಲುವು.
ಅಂತಿಮವಾಗಿ,
ಬದಲಾದರೆ ಭವಿಷ್ಯ.
ಬದಲಾಗದೆ ನಿಂತರೆ ಸ್ಥಗಿತ.
ಕುತಂತ್ರಗಳ ಮುಂದೆ ಕುಗ್ಗಿದರೆ ವಿನಾಶ.
ವಿರೋಧವನ್ನು ಮೆಟ್ಟಿಲಾಗಿಸಿಕೊಂಡು ಮುನ್ನಡೆದರೆ ಯಶಸ್ಸು ಖಚಿತ.
ಜೀವನದ ದಾರಿಯಲ್ಲಿ ವಿರೋಧಿಗಳು ಎದುರಾದಾಗ ಅವರಿಂದ ಓಡಿಹೋಗಬೇಡಿ.
ಅವರನ್ನು ನೋಡಿ ನಿಮ್ಮ ಹೆಜ್ಜೆ ನಿಲ್ಲಿಸಬೇಡಿ.
ನಿಮ್ಮ ಗುರಿಯತ್ತ ಇನ್ನಷ್ಟು ದೃಢವಾಗಿ ಹೆಜ್ಜೆ ಇಡಿ.
ಒಂದು ದಿನ ನೀವು ಹಿಂದಿರುಗಿ ನೋಡಿದಾಗ, ನಿಮ್ಮನ್ನು ತಡೆಯಲು ಬಂದಿದ್ದ ಅದೇ ವಿರೋಧಗಳು ನಿಮ್ಮನ್ನು ಇನ್ನಷ್ಟು ಗಟ್ಟಿಗೊಳಿಸಿದ್ದವು ಎಂಬ ಸತ್ಯ ನಿಮಗೆ ಅರಿವಾಗುತ್ತದೆ.
ಅದೇ ಬದುಕಿನ ದೊಡ್ಡ ಪಾಠ.
ಅದೇ ನಿಜವಾದ ಗೆಲುವು.
– ಭೀಮನಗೌಡ ಜಿ. ಪರಗೊಂಡ
