ಅಕ್ಕಮಹಾದೇವಿ ಬಡಾವಣೆಯ ಎರಡು ನಿವೇಶನ ಹಂಚಿಕೆಗೆ ಅನುಮೋದನೆ; ₹11.13 ಕೋಟಿ ಮೌಲ್ಯ
ಬೆಂಗಳೂರು, ಸೆ.9: ಬೆಂಗಳೂರು ಹೊರತಾಗಿ ರಾಜ್ಯದ ಇತರ ಭಾಗಗಳಲ್ಲೂ ನವೋದ್ಯಮ ಹಾಗೂ ಉದ್ಯಮಶೀಲತೆಗೆ ಉತ್ತೇಜನ ನೀಡುವ ಉದ್ದೇಶದ ‘ಲೀಪ್ (LEAP) ಗ್ರೋತ್ ಲ್ಯಾಬ್’ ಅನ್ನು ಕಲಬುರಗಿಯಲ್ಲಿ ಸ್ಥಾಪಿಸಲು ರಾಜ್ಯ ಸಚಿವ ಸಂಪುಟ ಅನುಮೋದನೆ ನೀಡಿದೆ.
ಮುಖ್ಯಮಂತ್ರಿ ಅವರ ಅಧ್ಯಕ್ಷತೆಯಲ್ಲಿ ಬುಧವಾರ ನಡೆದ ಸಚಿವ ಸಂಪುಟ ಸಭೆಯಲ್ಲಿ ಕಲಬುರಗಿ ಜಿಲ್ಲೆಯ ಅಕ್ಕಮಹಾದೇವಿ ಬಡಾವಣೆ (ಬಿದ್ದಾಪುರ ಕಾಲೋನಿ)ಯ ಸಿಎ ನಿವೇಶನ ಸಂಖ್ಯೆ 1 ಮತ್ತು 2 ಅನ್ನು ‘LEAP (Growth) Labs’ಗೆ ಹಂಚಿಕೆ ಮಾಡುವ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಗೃಹ, ಮಾಹಿತಿ ಹಾಗೂ ಜೈವಿಕ ತಂತ್ರಜ್ಞಾನ ಮತ್ತು ಇ-ಆಡಳಿತ ಸಚಿವ ಪ್ರಿಯಾಂಕ್ ಖರ್ಗೆ ತಿಳಿಸಿದ್ದಾರೆ.
ಬೆಂಗಳೂರು ಹೊರತಾದ ಪ್ರದೇಶಗಳಲ್ಲಿ ನವೋದ್ಯಮ ಮತ್ತು ಉದ್ಯಮಶೀಲತೆಯನ್ನು ಉತ್ತೇಜಿಸುವ ₹1,000 ಕೋಟಿ ಮೊತ್ತದ ‘ಲೀಪ್’ ಕಾರ್ಯಕ್ರಮದ ಭಾಗವಾಗಿ ಕಲಬುರಗಿಯಲ್ಲಿ ಈ ಪ್ರಯೋಗಾಲಯ ಸ್ಥಾಪಿಸಲಾಗುತ್ತಿದೆ.
ಉತ್ತರ ಕರ್ನಾಟಕದ ನವೋದ್ಯಮಿಗಳಿಗೆ ಅವಕಾಶ
‘ಬೆಂಗಳೂರು ಹೊರತಾದ ಕರ್ನಾಟಕದ ಪ್ರತಿಭೆ ಹಾಗೂ ಉದ್ಯಮಶೀಲತೆಗೆ ಹೆಚ್ಚಿನ ಅವಕಾಶ ಕಲ್ಪಿಸುವುದು ಲೀಪ್ ಕಾರ್ಯಕ್ರಮದ ಉದ್ದೇಶ. ಕಲಬುರಗಿಯಲ್ಲಿ ಲೀಪ್ ಗ್ರೋತ್ ಲ್ಯಾಬ್ ಸ್ಥಾಪನೆಯಾಗುವುದರಿಂದ ಉತ್ತರ ಕರ್ನಾಟಕದ ನವೋದ್ಯಮಿಗಳಿಗೆ ಹೊಸ ಅವಕಾಶಗಳು ದೊರೆಯಲಿವೆ’ ಎಂದು ಪ್ರಿಯಾಂಕ್ ಖರ್ಗೆ ತಿಳಿಸಿದ್ದಾರೆ.
ಕರ್ನಾಟಕ ಗೃಹ ಮಂಡಳಿಯ ನಿಯಮಾನುಸಾರ ಎರಡು ನಿವೇಶನಗಳನ್ನು ಮಂಡಳಿಯ ನಿಗದಿತ ಮೌಲ್ಯದ ಶೇ.30ರ ದರದಲ್ಲಿ ಹಂಚಿಕೆ ಮಾಡಲು ಸಂಪುಟ ಅನುಮೋದನೆ ನೀಡಿದೆ. ಎರಡು ನಿವೇಶನಗಳ ಒಟ್ಟು ಮೌಲ್ಯ ₹11.13 ಕೋಟಿ ಆಗಿದ್ದು, ಲೀಪ್ ಗ್ರೋತ್ ಲ್ಯಾಬ್ಗಾಗಿ ವಿನಂತಿಸಿರುವ ಇಲಾಖೆಯೇ ಈ ಮೊತ್ತವನ್ನು ಪಾವತಿಸಲಿದೆ.
ಕಲಬುರಗಿಯಲ್ಲಿ ಲೀಪ್ ಗ್ರೋತ್ ಲ್ಯಾಬ್ ಸ್ಥಾಪನೆಯಿಂದ ಬೆಂಗಳೂರು ಹೊರಗಿನ ಪ್ರದೇಶಗಳಲ್ಲಿ ನವೋದ್ಯಮ, ನಾವೀನ್ಯತೆ ಮತ್ತು ಉದ್ಯಮಶೀಲತೆಯ ಪರಿಸರ ವ್ಯವಸ್ಥೆಗೆ ಮತ್ತಷ್ಟು ಉತ್ತೇಜನ ದೊರೆಯಲಿದೆ ಎಂದು ಸಚಿವರು ಹೇಳಿದ್ದಾರೆ.
