ಬೆಂಗಳೂರು: ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ವಿರಾಟ್ ಕೊಹ್ಲಿ ಅವರ ಫಿಟ್‌ನೆಸ್‌ ಮತ್ತು ಆಹಾರ ಪದ್ಧತಿ ಬಗ್ಗೆ ಅಭಿಮಾನಿಗಳಲ್ಲಿ ಸದಾ ಕುತೂಹಲವಿದೆ. ಅದರಲ್ಲೂ ಅವರು ಸೇವಿಸುತ್ತಾರೆ ಎನ್ನಲಾಗುವ ಕಪ್ಪು ಬಣ್ಣದ ‘ಬ್ಲ್ಯಾಕ್ ವಾಟರ್’ ಹಲವು ಬಾರಿ ಚರ್ಚೆಗೆ ಕಾರಣವಾಗಿದೆ.
ಆದರೆ ಕೊಹ್ಲಿ ನೀಡಿರುವ ಮಾಹಿತಿಯ ಪ್ರಕಾರ, ಅವರು ಬ್ಲ್ಯಾಕ್ ವಾಟರ್ ಅನ್ನು ಪ್ರತಿದಿನ ಕುಡಿಯುವುದಿಲ್ಲ. 2021ರಲ್ಲಿ ನಡೆದ ಪ್ರಶ್ನೋತ್ತರ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ್ದ ಕೊಹ್ಲಿ, ಬ್ಲ್ಯಾಕ್ ವಾಟರ್ ಅನ್ನು ಕೆಲವೇ ಬಾರಿ ಪ್ರಯತ್ನಿಸಿರುವುದಾಗಿ ಹಾಗೂ ನಿಯಮಿತವಾಗಿ ಸೇವಿಸುವುದಿಲ್ಲ ಎಂದು ತಿಳಿಸಿದ್ದರು. ಮನೆಯಲ್ಲಿ ಆಲ್ಕಲೈನ್ ವಾಟರ್ ಸೇವಿಸುವುದಾಗಿ ಕೂಡ ಅವರು ಹೇಳಿದ್ದರು.
ಏನಿದು ಬ್ಲ್ಯಾಕ್ ವಾಟರ್?
ಸಾಮಾನ್ಯವಾಗಿ ‘ಬ್ಲ್ಯಾಕ್ ಆಲ್ಕಲೈನ್ ವಾಟರ್’ನಲ್ಲಿ ಫುಲ್ವಿಕ್ ಆಸಿಡ್‌ ಸೇರಿದಂತೆ ಕೆಲವು ಖನಿಜಾಂಶಗಳು ಇರಬಹುದು. ಈ ಅಂಶಗಳ ಕಾರಣದಿಂದ ನೀರಿಗೆ ಗಾಢ ಅಥವಾ ಕಪ್ಪು ಬಣ್ಣ ಕಾಣಿಸಿಕೊಳ್ಳುತ್ತದೆ. ಹೈಡ್ರೇಷನ್‌ ಹಾಗೂ ಖನಿಜಾಂಶಗಳ ಲಭ್ಯತೆಗೆ ಸಂಬಂಧಿಸಿದ ಪ್ರಯೋಜನಗಳಿವೆ ಎಂದು ಇಂತಹ ನೀರನ್ನು ಪ್ರಚಾರ ಮಾಡಲಾಗುತ್ತದೆ.
ಆದರೆ ಸಾಮಾನ್ಯ ನೀರಿಗಿಂತ ಬ್ಲ್ಯಾಕ್ ಅಥವಾ ಆಲ್ಕಲೈನ್ ವಾಟರ್ ಹೆಚ್ಚು ಆರೋಗ್ಯ ಪ್ರಯೋಜನ ನೀಡುತ್ತದೆ ಎಂಬುದಕ್ಕೆ ಸಾಕಷ್ಟು ದೃಢ ವೈಜ್ಞಾನಿಕ ಪುರಾವೆಗಳು ಲಭ್ಯವಿಲ್ಲ. ಹೀಗಾಗಿ ಸೆಲೆಬ್ರಿಟಿಗಳು ಬಳಸುತ್ತಾರೆ ಎಂಬ ಕಾರಣಕ್ಕೆ ಅದನ್ನೇ ಎಲ್ಲರೂ ಅನುಸರಿಸಬೇಕು ಎನ್ನುವುದು ಸೂಕ್ತವಲ್ಲ.
ಕೊಹ್ಲಿಯ ಫಿಟ್‌ನೆಸ್‌ ಜೀವನಶೈಲಿಯಲ್ಲಿ ಆಹಾರ, ವ್ಯಾಯಾಮ, ವಿಶ್ರಾಂತಿ ಮತ್ತು ಹೈಡ್ರೇಷನ್‌ ಸೇರಿದಂತೆ ಹಲವು ಅಂಶಗಳು ಪ್ರಮುಖವಾಗಿವೆ. ಅವರ ದೈಹಿಕ ಫಿಟ್‌ನೆಸ್‌ಗೆ ಬ್ಲ್ಯಾಕ್ ವಾಟರ್ ಒಂದೇ ಕಾರಣ ಎಂದು ಹೇಳಲು ಯಾವುದೇ ಆಧಾರವಿಲ್ಲ. ಅಲ್ಲದೆ, ಕೊಹ್ಲಿ ಸ್ವತಃ ಬ್ಲ್ಯಾಕ್ ವಾಟರ್ ಅನ್ನು ನಿಯಮಿತವಾಗಿ ಸೇವಿಸುವುದಿಲ್ಲ ಎಂದು ಹೇಳಿರುವುದು ಗಮನಾರ್ಹ.
